سنه قربان
گجه گوردوم قورولوب مجلس اعیان سنه قربان
نجه مجلس دیه سن روضه ی رضوان سنه قربان
بیر طرفده اوتوروب مفته یین لر هاموسی
بیر طرفده سالنیب سفره ی الوان سنه قربان
بیر اوجا صوتیله گوردوم كه چاووش سسلنیری
مكه دن گلده جماعت حاجی بهمان سنه قربان
من ده چیخدیم كوچه یه تا كی گورم وار نه خبر
گوردوم اطرافه آلیب قیز گلین اوغلان سنه قربان
صف چكیب دوره لیب چاپلوس آداملار حاجی نی
هچ ولایتده پوزولماز بیله بوستان سنه قربان
او جماعت آراسیندا آق عرقچینده حاجی
گوبلك تك باش آچیب اولدی نمایان سنه قربان
حاجی پول خرج ایلیب آلدی لقب اولدی حاجی
عیبی یوخدور اولا یا اولمویا ایمان سنه قربان
خبر آلدیم حاجیدان شیطانا داش وورماقینی
دیدی آتدیم داشی گولدو منه شیطان سنه قربان
دیدیم حاضر اولا بیلدون كسن اسماعیلیوی
دیدی فكر ایله مدیم بو ایشه اصلان سنه قربان
آللادیب آللاداجاق ملته تزویرچی لر
آللانیب آلاناجاخ قیز ، گلین ، اوغلان سنه قربان
خواب غفلتده یاتیپ خورنا چكر ملت هامو
باسیپ حتما بو گجه ملتی یورقان سنه قربان
ایتیمیز قورتا دونوپدور قویونون وای حالینا
داها مشكل تاپیلا ایچماقا ایران سنه قربان
دره لر خلوت اولوپدور ، تولكی لر بیگ بزنیب
یازلیپدیر خروزین قتلینه فرمان سنه قربان
زور و تزویریله زر باخ كی نجه ال بیر اولوب
جالیب یر أوزونه ، سو یرینه قان سنه قربان
دمكراسی هارا بس كنده و زنجیره هارا
روا بیلمز بو ایشی حیوانا حیوان سنه قربان
وار امیدیم داغیلا بتكده بتلار سینالار
اولا تا كاخ ستم خاكیله یكسان سنه قربان